السلام عليكم ورحمة الله وبركاته
كيييفكم وكيف تجهيزات العيد :D
ان شاء الله انكم بخير والأمور طيبة
كان ببالي إني أسوي نماذج للتوزيعات بنفسي
بالخطوات لكن مثل ما أنتوا عارفين الوقت برمضان ما يساعد أبدا
لدرجة أن هالتدوينة على أكثر من مرة كتبتها غير تجميع الصور :(
المهم فضلت يكون تبويب اسمه "مختارات" بين وقت ووقت بختار
مجموعة صور من النت حول موضوع معين تفيدكم إن شاء الله
بتكون سلسلة طويلة خصوصا إن فيه بعض الأفكار مايمديني أنفذها
لذلك عرض الفكرة مع شرح مبسط يكفي
ماعلينا من هالمقدمة نشوف الصور :p
تحت كل صورة بحط تعليق أو توضيح للفكرة
وبآخر الموضوع تلقون الأماكن اللي تقدرون توفرون الأدوات
ووين موجوده هالأماكن
يلا نبدأ ❤
شرايط + ورق مزخرف + خيوط صوف + التغليف البني او أكياس بنية
نفس الورق بس بتصميم ثاني رايق وحلو
برضو هنا بتصميم أروق
التاق اللي مكتوب عليه لوف تلقونهم بجرير نفسهم بالضبط بأحجام مختلفة
الزخرفة اللي بنهاية الكيس نسويها بمقص متموج الحافة + خرامة
هنا فكره مرررره بطلة وما تكلف
أكياس بنية + ورق الكب كيك بحجمين + مشبك غسيل + بطاقة صغيره
سهلة ماتحتاج تلصيق وحوسه
هنا أنا تنحت من بساطة الفكرة وجمالها
أكياس بنيه + ورق السفرة الأبيض + شريطة أو أي زينة عندك
برضو هنا فكرة بالأكياس البنية
وماتكلف أبدا مجرد الكيس وخيط سميك
هنا برضو قصاصات ورق مزخرف وأكياس بنيه
أكياس بنية + ورق السفرة + مشبك صغير
رايقة وخفيفة ❤
أكياس بنية + ورق مطبوع عليه الكلام وخيطته بالماكينة
واللي ماعندها ماكينة لصقيها وخلاص
أكياس ملونه تغيير عن البني
والإضافات تقدرون تسوونها بورق القص واللصق
هنا أشكال مختلفة للورق الملون
نسوي منه اللي نبي فهنا يجي إبداعك وخيالك وأفكارك
جممميلة وحيوية ومناسبة لفصل الصيف
كيسين واحد أبيض وواحد أخضر مقصقص من تحت عشان يعطي شكل العشب
وفراشة كيوت من فوق ممكن تعوضونها بوردة ورقية أو إصطناعية
هنا طريقة لورق سهله كل اللي تحتاجينه
ورق ودباسه وتسوينها مثل الصورة
هذي بنفس الفكرة بأشكال مختلفة
مره ورق مزخرف وملون
ومرة ورق سولفان وورق سادة
قالب كب كيك + ورق سولفان + شرايط
تعطينا هالنتيجة البسيطة والحلوة
هذي أسهل شي صدقوني هههههه
ورق تغليف شفاف ونزينه بأي شكل نبغاه
ورق ملون نزينه من برا بالأشكال اللي نبغاها
ورق شبه شفاف ممكن تستخدمون الشفاف نفسه الي نشف فيه ايام المدرسة
ونزينه بقطعة خيش ودانتيل او ورق السفرة او شرايط
خيش وشريطة ممكن نكون حاطين الشوكلت بتغليفه سولفان من جوا
عشان ما يتأثر بالخيش
ورق كُرنيش وشرايط ونلفها مثل الحلاوة
سلال صغيرة تشوفونها بمحلات هزاز وطخته
أفكار للحلاوة اذا ودكم بشيء خفيف مره
وهنا فكرة بالقماش
وهنا بأكواب البوب كورن
تغيير عن اللي قبل
إلى هنا نوقف
وممكن بأبداعكم وخيالكم تطلع معكم فكرة أحلا وأحلا
وكل ما كان عيدياتكم بسيطة كل ما كانت أجمل بعيدة عن التكلف
والتصنع اللي نشوفه هالأيام من التبذير الزايد عن حده
الأدوات:
الأكياس البنية + أكواب البوب كورن + الأكياس الشفافة :
بمحلات البلاستيك أو محلات هزاز
" اذا ماعرفتوا تشرحون له خذوا معكم صورة أو قولوا له أكياس الفلافل ويعرفها " :D
الأكياس الملونة: جرير ودايسو
ورق السولفان : بالمكتبات او هزاز
ورق الكرنيش + الخيش: المكتبات
باقي الأدوات ان شاء الله انها معروفة
لفتة بسيطة:
إذا كنتوا من الناس اللي يروحون يصلون العيد
خذوا لكم كيس حلاوة وزينوها بأبسط طريقة ووزعوها على الصغيرات بالمسجد
أو حطوا معها بطاقة شحن١٠ ريال مثلا ووزعوها على العاملات الموجودات
تكسبون أجر البسمة والفرحة لقلوب الناس
الله يجعل أيامكم جميلة وسعيدة دائما وأبدا
نشوفكم بتدوينة ثانية ولاتنسون
إذا أعجبكم الموضوع شاركوني اعجابكم بالتعليقات ❤
سلام ❤
ليست هناك تعليقات:
إرسال تعليق